પાકિસ્તાનમાં શિવરાત્રિ માટે 200 વર્ષ જૂનું મંદિર ખોલવામાં આવ્યું, કટાસરાજમાં પણ તૈયારીઓ શરૂ થઇ ગઇ


900 વર્ષ જૂના કટાસરાજ મંદિરમાં શિવજીના આંસુઓથી બનેલો 150 ફૂટ લાંબો અને 90 ફૂટ પહોળો કુંડ છે

મહાશિવરાત્રિ પર્વ 21 ફેબ્રુઆરીએ ઉજવવામાં આવશે. પાકિસ્તાનમાં મહાશિવરાત્રિ પર્વ માટે તૈયારીઓ શરૂ થઇ ગઇ છે. જેના માટે બલૂચિસ્તાનના જૌબમાં 200 વર્ષ જૂના હરિ મંદિરને શુક્રવારે મહાશિવરાત્રિ માટે ખોલવામાં આવશે. ઇસ્લામાબાદમાં પણ હાલમાં જ બનેલાં શિવ મંદિરને શિવભક્તો માટે ખોલવામાં આવી દીધું છે. આ સિવાય પેશાવર, મુઝફરાબાદ, લાહૌરનું કૃષ્ણા અને વાલ્મીકિ મંદિર, રાવલપિંડીના આ જ નામના બે અન્ય મંદિરોમાં પણ મહાશિવરાત્રિ પર્વ ઉજવવામાં આવશે. આ જગ્યાએ મુસ્લિમ સમુદાયના લોકો પણ સામેલ થાય છે.

પાકિસ્તાનના સિંધ પ્રાંતના ચકવાલ જિલ્લામાં સ્થિત ભગવાન શિવના કટાસરાજ મંદિરમાં પણ શિવરાત્રિ પર્વ માટે તૈયારી શરૂ થઇ ગઇ છે. ત્યાં જ, ગત વર્ષે પુલવામા હુમલા અને ત્યાર બાદ એર સ્ટ્રાઇક થવાના કારણે શિવરાત્રિએ ભારતથી કોઇપણ શ્રદ્ધાળુ દર્શન કરવા માટે અહીં આવ્યાં નહોતાં. સુપ્રીમ કોર્ટના પ્રતિબંધ બાદ પાકિસ્તાન સરકાર મંદિરને યૂનેસ્કોની હેરિટેજ લિસ્ટમાં લઇ જવાનો પ્રયાસ કરી રહી છે. આ કારણે ડિસેમ્બર 2019માં ભારતથી કટાસરાજ મંદિર દર્શન માટે 97 ભારતીય શ્રદ્ધાળુઓ ગયાં હતાં. શિવરાત્રિએ ભારતથી આ મંદિરમાં અનેક શ્રદ્ધાળુઓ જાય તેવી સંભાવના છે.

કટાસરાજમાં તૈયારીઓ શરૂઃ-
પાકિસ્તાનના ચકવાલ જિલ્લામાં સ્થિત ભગવાન શિવના કટાસરાજ મંદિરમાં મહાશિવરાત્રિ પર્વ ઉજવવા માટે તૈયારીઓ શરૂ થઇ ગઇ છે. એક્યૂ ટ્રસ્ટ પ્રાપર્ટી બોર્ડના એડિશનલ સેક્રેટરી ફરાઝ અબ્બાસે જણાવ્યું કે, ભારતથી આવતાં હિંદુઓ માટે દરેક પ્રકારની વ્યવસ્થા કરવામાં આવી રહી છે. જેના માટે સરોવર અને તેની આસપાસ સાફ-સફાઈનું કામ શરૂ કરી દેવામાં આવ્યં છે. અહીં અન્ય સ્થાને આવેલાં મંદિરોમાં પણ તેમની સરકાર ખાસ વ્યવસ્થા કરી રહી છે.

કટાસરાજ મંદિર લગભગ 900 વર્ષ જૂનું છેઃ-
લગભગ 900 વર્ષ જૂનું ભગવાન શિવનું કટાસરાજ મંદિર લાહૌરથી 280 કિમી દૂર પહાડો ઉપર બનેલું છે. આ મંદિર પાકિસ્તાનના સિંધ પ્રાંતના ચકવાલ જિલ્લામાં છે. ચકવાલથી લગભગ 40 કિમી દૂર કટસ નામના સ્થાને એક પહાડ ઉપર સ્થિત છે. આ સ્થાન સાથે જોડાયેલી અનેક માન્યતાઓ છે, એટલાં માટે જ હિંદુઓની આસ્થાનું પ્રમુખ કેન્દ્ર છે. એક માન્યતા પ્રમાણે, દેવી જ્યારે સતી થયાં હતાં ત્યારે ભગવાન શિવની આંખમાંથી જે આંસુ પડ્યાં હતાં તેનાથી અહીં 150 ફૂટ લાંબો અને 90 ફૂટ પહોળો કુંડ બન્યો છે.

પાકિસ્તાનમાં શિવરાત્રિ માટે 200 વર્ષ જૂનું મંદિર ખોલવામાં આવ્યું, કટાસરાજમાં પણ તૈયારીઓ શરૂ થઇ ગઇ was originally published on News4gujarati

મહાશિવરાત્રિ – શિવલિંગ ઉપર ધતૂરો, બીલીપત્ર સાથે શમી વૃક્ષના પાન વિશેષરૂપથી ચઢાવો, શનિદોષથી મુક્તિ મળશે


શિવરાત્રિએ તાંબાના લોટામાં ગંગાજળ, ચોખા અને સફેદ ચંદન મિક્સ કરીને શિવલિંગ ઉપર ૐ નમઃ શિવાય મંત્રોચ્ચાર સાથે અર્પણ કરો

શુક્રવાર, 21 ફેબ્રુઆરીએ મહાશિવરાત્રિ છે. આ દિવસે શિવજી, માતા પાર્વતી, ગણેશજી, કાર્તિકેય સ્વામી અને નંદીની વિશેષ પૂજા કરવી જોઇએ. ભગવાનની પ્રસન્નતા માટે વ્રત કરવામાં આવે છે. પૂજામાં અનેક પ્રકારની વસ્તુઓ સાથે ફૂલ અને પાન પણ શિવલિંગ ઉપર ચઢાવવા જોઇએ. મોટાભાગના લોકો શિવલિંગ ઉપર ધતૂરો અને બીલીપાન ચઢાવે છે, તેમણે સમડા(શમી)ના પાન પણ શિવલિંગ ઉપર ચઢાવવા જોઇએ. ઉજ્જૈનના જ્યોતિષાચાર્ય પં. મનીષ શર્મા પ્રમાણે શિવપૂજામાં ફૂલ-પાનનું વિશેષ મહત્ત્વ છે. આ લેખમાં જાણો સમડાના પાન સાથે જોડાયેલી ખાસ વાતો….

સમડાના પાનનું ખૂબ જ વધારે મહત્ત્વ છે. આ વૃક્ષ પૂજનીય અને પવિત્ર છે. ઘરમાં સમડાનું વૃક્ષ વાવવાથી શનિના બધા જ દોષથી મુક્તિ મળી શકે છે. સમડાના પાન શિવલિંગ ઉપર ચઢાવવાથી સૌભાગ્યની કામના પૂર્ણ થઇ શકે છે. શિવરાત્રિએ સવારે શિવ મંદિર જવું અને તાંબાના લોટામાં ગંગાજળ અથવા પવિત્ર જળમાં ગંગાજળ, ચોખા, સફેદ ચંદન મિક્સ કરીને શિવલિંગ ઉપર ૐ નમઃ શિવાય મંત્ર બોલીને અર્પણ કરો.

તાંબાના લોટાથી જળ ચઢાવ્યાં બાદ શિવલિંગ ઉપર ચોખા, બીલીપાન, સફેદ વસ્ત્ર, જનોઈ અને મીઠાઈ સાથે જ સમડાના પાન પણ ચઢાવવા જોઇએ. સમડાના પાન ચઢાવતી વખતે આ મંત્રનો જાપ કરો.

अमंगलानां च शमनीं शमनीं दुष्कृतस्य च।
दु:स्वप्रनाशिनीं धन्यां प्रपद्येहं शमीं शुभाम्।।

સમડાના પાન ચઢાવ્યાં બાદ શિવજીને ધૂપ, દીપ અને કપૂરથી આરતી કરી પ્રસાદ ગ્રહણ કરો. આ પ્રકારે પૂજા કરવાથી ઘર-પરિવારમાં સુખ-સમૃદ્ધિ જાળવી રાખવાની કામના પૂર્ણ થઇ શકે છે.

મહાશિવરાત્રિ – શિવલિંગ ઉપર ધતૂરો, બીલીપત્ર સાથે શમી વૃક્ષના પાન વિશેષરૂપથી ચઢાવો, શનિદોષથી મુક્તિ મળશે was originally published on News4gujarati

19 ફેબ્રુઆરીએ બુધવાર અને વિજયા એકાદશીનો યોગ, ભગવાન વિષ્ણુ સાથે જ ગણેશજીની પૂજા કરો


દરેક શુભ કાર્યોમાં સફળતા મેળવવા માટે વિજયા એકાદશીનું વ્રત કરવામાં આવે છે

બુધવાર, 19 ફેબ્રુઆરીએ મહા મહિનાની વદ પક્ષની અગિયારસ છે. આ અગિયારસને વિજયા એકાદશી કહેવામાં આવે છે. ઉજ્જૈનના જ્યોતિષાચાર્ય પં. મનીષ શર્મા પ્રમાણે આ વ્રત કરવાથી બધી જ પરિસ્થિતિઓ ઉપર વિજય પ્રાપ્ત કરવાની શક્તિ મળે છે. કોઇ શુભ કાર્યમાં સફળતા મેળવવા માંગતા લોકોએ આ વ્રત કરવું જોઇએ. ગણેશજી બુધવારના સ્વામી છે. બુધવાર અને એકાદશીના યોગમાં વિષ્ણુ ભગવાન સાથે જ, ગણેશ પૂજા કરવી જોઇએ. આ એકાદશીએ કયા-કયા શુભ કામ કરી શકાય છે…

સ્કંદપુરાણમાં બધી જ એકાદશીઓનું મહત્ત્વ ઉલ્લેખવામાં આવ્યું છેઃ-
હિંદુ પંચાંદમાં એક મહિનામાં બે એકાદશી એટલે વર્ષમાં 24 એકાદશી આવે છે. જે વર્ષે અધિક મહિનો હોય છે, તે વર્ષમાં 26 એકાદશી આવે છે. બુધવારે વિજયા એકાદશી વ્રત છે. સ્કંદ પુરાણના એકાદશી મહાત્મ્ય અધ્યાયમાં બધી એકાદશીઓનું મહત્ત્વ ઉલ્લેખવામાં આવ્યું છે. આ એકાદશી વ્રતના પુણ્ય ફળથી બધા જ કાર્યોમાં વિજય એટલે સફળતા મેળવવાની શક્તિ મળે છે.

આ વ્રત કરી રીતે કરી શકો છોઃ-
એકાદશીએ સવારે જલ્દી જાગવું અને સ્નાન કર્યા બાદ ભગવાન વિષ્ણુ સાથે લક્ષ્મીજી સાથે પૂજન કરવું. અભિષેક કરો. પૂજામાં ફળ-ફૂલ, ગંગાજળ, ધૂપ-દીપ અને પ્રસાદ અર્પણ કરો. આખો દિવસ ભૂખ્યા રહી શકો નહીં તો એક સમયે ફળાહાર કરો. ફળના રસનું સેવન કરી શકો છો. રાત્રે ભગવાન વિષ્ણુ સામે દીવો પ્રગટાવો. ભગવાનના મંત્રનો જાપ કરો. ૐ નમો ભગવતે વાસુદેવાય મંત્રનો જાપ કરી શકો છો. ભગવાન વિષ્ણુને કેળા અને હલવાનો ભોગ ધરાવો. વિષ્ણુજીને પીળા વસ્ત્ર ચઢાવો. લક્ષ્મી સાથે ભગવાન વિષ્ણુની પૂજા કરો. બીજા દિવસે એટલે બારસ (20 ફેબ્રુઆરી)એ કોઇ બ્રાહ્મણને દાન-દક્ષિણા આપો. ત્યાર બાદ સ્વયં ભોજન ગ્રહણ કરો.

ગણેશજીની પૂજાઃ-
ભગવાન વિષ્ણુની પૂજા પહેલાં પ્રથમ પૂજ્ય ગણેશજીને દૂર્વાની 21 ગાંઠ ચઢાવો અને શ્રી ગણેશાય નમઃ મંત્રનો જાપ 108વાર કરો. ગણેશજીની પૂજા ગજાનંદ સ્વરૂપમાં કરવામાં આવે છે. એટલાં માટે કોઇ હાથીને શેરડી ખવડાવો. ગણેશજી સાથે જ રિદ્ધિ-સિદ્ધિની પણ પૂજા કરો. તેનાથી ઘરમાં સુખ-સમૃદ્ધિ વધે છે.

19 ફેબ્રુઆરીએ બુધવાર અને વિજયા એકાદશીનો યોગ, ભગવાન વિષ્ણુ સાથે જ ગણેશજીની પૂજા કરો was originally published on News4gujarati

મહાશિવરાત્રિએ શનિ ગ્રહના લીધે રાજયોગ બનશે, 1961માં 5 ગ્રહો આ જ સ્થિતિમાં હતાં


ગ્રંથોમાં મહાશિવરાત્રિને સિદ્ધ રાત્રિ કહેવામાં આવે છે, આ દિવસે સર્વાર્થસિદ્ધિ યોગ પણ બની રહ્યો છે

મહાશિવરાત્રિ પર્વ 21 ફેબ્રુઆરીએ ઉજવવામાં આવશે. આ વર્ષે લગભગ 59 વર્ષ બાદ ગ્રહોની વિશેષ સ્થિતિ બની રહી છે. કાશી હિંદુ વિશ્વવિદ્યાલયના જ્યોતિષાચાર્ય પં. ગણેશ મિશ્રા પ્રમાણે આ વર્ષે શનિ પોતાની જ રાશિ મકરમાં થઇને પંચમહાપરૂષ યોગમાંથી શશયોગ બનાવી રહ્યો છે. જે રાજયોગ છે. સાથે જ, મકર રાશિમાં શનિ અને ચંદ્ર રહેશે, કુંભમાં સૂર્ય-બુધની યુતિ રહેશે. શુક્ર પોતાની જ ઉચ્ચ રાશિ મીનમાં રહેશે. આ પહેલાં ગ્રહોની આવી સ્થિતિ 1961માં બની હતી.

શિવરાત્રિ એટલે સિદ્ધ રાત્રિઃ-
ગ્રંથોમાં 3 પ્રકારની વિશેષ રાત્રિ જણાવવામાં આવી છે. જેમાં શરદ પૂનમને મોહરાત્રિ, દિવાળીને કાલરાત્રિ તથા મહાશિવરાત્રિને સિદ્ધ રાત્રિ કહેવામાં આવી છે. આ વર્ષે મહાશિવરાત્રિ ઉપર ચંદ્ર અને શનિની મકરમાં યુતિ સાથે શશ યોગ બની રહ્યો છે. મોટાભાગે શ્રવણ નક્ષત્રમાં આવતી શિવરાત્રિ અને મકર રાશિના ચંદ્રનો યોગ બને છે. જ્યારે આ વર્ષે 59 વર્ષ બાદ શનિના મકર રાશિમાં હોવાથી તથા ચંદ્રનો સંચાર અનુક્રમમાં શનિના વર્ગોત્તમ અવસ્થામાં શશયોગનો સંયોગ બની રહ્યો છે. ચંદ્ર મન તથા શનિ ઊર્જાનો કારક ગ્રહ છે. આ યોગ સાધના અને પૂજાપાઠની સિદ્ધિ માટે વિશેષ મહત્ત્વ ધરાવે છે. ચંદ્રને મન તથા શનિને વૈરાગ્યનો કારક ગ્રહ માનવામાં આવે છે. તેના સંયોગમાં કરવામાં આવતી શિવપૂજાથી શુભફળ વધી જાય છે.

સર્વાર્થસિદ્ધિનો સંયોગ રહેશેઃ-
જ્યોતિષાચાર્ય પં. મિશ્રાએ જણાવ્યું કે, મહાશિવરાત્રિએ સર્વાર્થસિદ્ધિ યોગ પણ બની રહ્યો છે. આ યોગમાં શિવ-પાર્વતીનું પૂજન શ્રેષ્ઠ માનવામાં આવ્યું છે. શાસ્ત્રીય વિધિ-વિધાન પ્રમાણે શિવરાત્રિનું પૂજન નિશીથકાળમાં કરવું સર્વશ્રેષ્ઠ રહેશે. જોકે, રાત્રિના ચારેય પ્રહરમાં પોતાની સુવિધાનુસાર આ પૂજા કરી શકો છો.

આ રીતે પૂજા કરો, રાત્રિ જાગરણનું વિધાન પણ છેઃ-
માટીના લોટામાં પાણી અથવા દૂધ ભરીને, ઉપરથી બીલીપાન, આક-ધતૂરાના ફૂલ, ચોખા વગેરે રાખીને શિવલિંગ ઉપર ચઢાવો. શિવપુરાણનો પાઠ અને મહામૃત્યુંજય મંત્રનો અથવા શિવના પંચાક્ષર મંત્ર ૐ નમઃ શિવાયનો જાપ આ દિવસે કરવો જોઇએ. સાથે જ, મહાશિવરાત્રિના દિવસે રાત્રિ જાગરણનું પણ વિધાન છે.

મહાશિવરાત્રિએ શનિ ગ્રહના લીધે રાજયોગ બનશે, 1961માં 5 ગ્રહો આ જ સ્થિતિમાં હતાં was originally published on News4gujarati

બુધવારે ગણેશ ચોથ, આ દિવસે ભગવાન ગણપતિને દૂર્વા ચઢાવીને 12 મંત્રનો જાપ કરવો


ચોથ તિથિએ ગણેશજી સાથે ચંદ્રદેવની પૂજા કરવાની પરંપરા છે.

બુધવાર, 12 ફેબ્રુઆરીએ મહા મહિનાના વદ પક્ષની ચોથ તિથિ રહેશે. આ દિવસે સવારે 7 વાગ્યા સુધી તીજ અને ત્યાર બાદ ચોથ તિથિ શરૂ થશે. ઉજ્જૈનના જ્યોતિષાચાર્ય પં.મનીષ શર્મા પ્રમાણે ચોથ તિથિએ ગણેશજી સાથે જ ચંદ્રદેવની પૂજા કરવાની પરંપરા છે. આ તિથિના સ્વામી ગણેશજી છે. માન્યતા છે કે, આ દિવસે ઘરની સુખ-સમૃદ્ધિની કામનાથી ભગવાન ગણેશ માટે વ્રત કરવામાં આવે છે. સાંજે ચંદ્ર ઉદય બાદ ચંદ્રદેવની પૂજા કરવામાં આવે છે. ચંદ્ર દેવને દૂધનો અર્ધ્ય અર્પણ કરવામાં આવે છે, ધૂપ-દીપ પ્રગટાવીને આરતી કરવામાં આવે છે.

ગણેશજીની પૂજા કઇ રીતે કરશોઃ-

  • ગણેશ ચોથ એટલે બુધવારે સવારે વહેલાં જાગવું અને સ્નાન બાદ સોના, ચાંદી, તાંબા, પીત્તળ અથવા માટીથી બનેલાં ભગવાન શ્રીગણેશની પ્રતિમા ઘરના મંદિરમાં સ્થાપિત કરો. જો તમે ઇચ્છો તો ગણેશજીના મંદિરે પણ જઇ શકો છો. ત્યાર બાદ ભગવાન શ્રીગણેશને જનોઈ પહેરાવો. અબીર, ગુલાલ, ચંદન, સિંદૂર, અત્તર વગેરે ચઢાવો. પૂજાનો દોરો અર્પણ કરો. ચોખા ચઢાવો.
  • ગણેશ મંત્ર ૐ ગં ગણપતયે નમઃ મંત્રનો જાપ કરીને દૂર્વા ચઢાવો. લાડવાનો ભોગ ધરાવો. કપૂર પ્રગટાવીને ગણેશજીની આરતી કરો. પૂજા બાદ પ્રસાદ અન્ય ભક્તોને વહેંચો. જો સંભવ હોય તો ઘરમાં બ્રાહ્મણોને ભોજન કરાવો. દક્ષિણા આપો. ગણેશ ચોથના વ્રત કરનાર વ્યક્તિએ સાંજે ચંદ્ર દર્શન કરવા જોઇએ. પૂજા કરવી જોઇએ. ત્યાર બાદ જ ભોજન કરવું જોઇએ.
  • ગણેશજીની પૂજામાં 12 મંત્રનો જાપ કરવો જોઇએ. ૐ સુમુખાય નમઃ, ૐએકદંતાય નમઃ, ૐ કપિલાય નમઃ, ૐ ગજકર્ણકાય નમઃ, ૐ લંબોદરાય નમઃ, ૐ વિકટાય નમઃ, ૐ વિઘ્નાશાનાય નમઃ, ૐ વિનાયકાય નમઃ, ૐ ધૂમ્રકેતવે નમઃ, ૐ ગણાધ્યક્ષાય નમઃ, ૐ ભાલચંદ્રાય નમઃ, ૐ ગજાનનાય નમઃ.

બુધવારે ગણેશ ચોથ, આ દિવસે ભગવાન ગણપતિને દૂર્વા ચઢાવીને 12 મંત્રનો જાપ કરવો was originally published on News4gujarati

Blog Stats

  • 517,408 hits
%d bloggers like this: