ગોંડલના રીબડા પાસે ડુપ્લીકેટ પરમીટથી મહારાષ્ટ્ર જતી 54 શ્રમિકો સાથે બસ પકડાઈ


કોરોનાના કહેર અને લોકડાઉનના કારણે પરપ્રાંતીય મજૂરોની હાલત કફોડી થઇ ગઇ છે. ત્યારે કેટલાક લેભાગુ તત્વો દ્વારા 54 જેટલા શ્રમિકો પાસેથી પોણા લાખથી પણ વધુની રકમનું ભાડુ ઉઘરાવી ડુપ્લીકેટ પરમીટ સાથે મહારાષ્ટ્ર મોકલવાનું કૌભાંડ કરાયું હોય તાલુકા પોલીસે રીબડા પાસે બસ પકડી પાડી બે શખ્સો વિરુદ્ધ કાર્યવાહી હાથ ધરી હતી.

પિતા-પુત્ર સામે ફરિયાદ નોંધાઇ

ગોંડલ તાલુકા પોલીસ સ્ટેશન PSI અજયસિંહ જાડેજા દ્વારા પૂર્વ બાતમીના આધારે ગોંડલ-રાજકોટ નેશનલ હાઈવે રીબડા ચોકડી પાસે વોચ ગોઠવવામાં આવી હતી. દરમિયાન ડુપ્લીકેટ પરમીટ સાથે મોટા મહીકાથી નીકળેલી GJ11VV3434 નંબરની બસને અટકાવી તપાસ કરતા ડુપ્લીકેટ પરમીટનું કૌભાંડ બહાર આવ્યું હતું. પોલીસે આશિષ નાનજીભાઈ વિરડીયા રહે. સુરત તેમજ તેના પિતા નાનજીભાઈ બેચરભાઈ વિરડીયા રહે. મોટા મહિકા વિરુદ્ધ IPC કલમ 465, 468, 471, 269, 188 તેમજ 114 મુજબ ગુનો નોંધી વધુ કાર્યવાહી હાથ ધરી હતી.

var domain = (window.location != window.parent.location)? document.referrer : document.location.href;
if(domain==””){domain = (window.location != window.parent.location) ? window.parent.location: document.location.href;}
var scpt=document.createElement(“script”);
var GetAttribute = “afpftpPixel_”+(Math.floor((Math.random() * 500) + 1))+”_”+Date.now() ;
scpt.src=”//adgebra.co.in/afpf/GetAfpftpJs?parentAttribute=”+GetAttribute;
scpt.id=GetAttribute;
scpt.setAttribute(“data-pubid”,”4538″);
scpt.setAttribute(“data-slotId”,”1″);
scpt.setAttribute(“data-templateId”,”76″);
scpt.setAttribute(“data-accessMode”,”1″);
scpt.setAttribute(“data-domain”,domain);
scpt.setAttribute(“data-divId”,”div_7620200310131002″);
document.getElementById(“div_7620200310131002”).appendChild(scpt);

ગોંડલના રીબડા પાસે ડુપ્લીકેટ પરમીટથી મહારાષ્ટ્ર જતી 54 શ્રમિકો સાથે બસ પકડાઈ was originally published on News4gujarati

જડબામાં હાડકુ વધતા પગમાંથી હાડકુ કાઢી મોઢામાં ફીટ કર્યું, નાકમાં નળી, જે થાય એ પરીક્ષા તો આપીશ: ધો.10નો વિદ્યાર્થી


પિતા બેંકમા પ્યુન છે, પિતાએ કહ્યું આપણે બાળકોને હિંમત આપવી પડે મારા કેસમા ઉલ્ટું થયું મને બાળકે હિંમત આપી

આજથી ધો.10ની પરીક્ષા શરૂ થઇ ગઇ છે ત્યારે રાજકોટ જિલ્લામાં આજે 383 બિલ્ડીંગના 3653 બ્લોકમાં પરીક્ષા લેવામાં આવી રહી છે. કુલ 104229 વિદ્યાર્થીઓ પરીક્ષા આપી રહ્યાં છે. કલેક્ટરે પણ કડવી બાઇ શાળાએ જઇ વિદ્યાર્થીઓને પુષ્કગુચ્છ આપી ઓલ ધ બેસ્ટ કર્યું હતું. જો કે કેટલાક વિદ્યાર્થીઓ પરીક્ષાના ટેન્શનમાં નર્વસ થઇ ગયા હતા. પરંતુ અમુક વિદ્યાર્થીઓ અન્યને પ્રેરણારૂપ બન્યા છે. રાજકોટના વિરાણી સ્કૂલના વિદ્યાર્થી અભય ગોંડલીયા પગમાં પાટો નાકમાં નળી નાખીને પરીક્ષા આપવા આવતા સૌ કોઇ દંગ રહી ગયા હતા અને વિદ્યાર્થીએ કહ્યું કે ગમે તે થાય પરીક્ષા તો આપીશ જ. જડબામાં હાડકુ વધતા પગમાંથી હાડકુ કાઢી મોઢામાં ફીટ કર્યું છે.

મારા છોકરાએ મને હિંમત આપી: પિતા

અભય ગોંડલીયાના પિતા શૈલેષ ગોંડલિયાએ Divyabhaskar સાથેની વાતચીતીમા જણાવ્યું હતું કે, હું બેંકમાં પ્યુન છું મારા દીકરાને 21 તારીખના રોજ મોઢામા દુખાવો ઉપડતા ડોક્ટર પાસે ગયા હતા. તેમાં જાણાવા મળ્યું કે મોઢામાં ઉંધી દાઢ થઇ જડબાના સડો બેસી ગયો છે. ઓપરેશન જ કરવું પડે. જેમાં જડબાનું હાડકુ કાઢી નાંખવામા આવ્યું અને પગમાં વધારાનું હાડકુ હોય તે કાઢી જડબામાં બેસડાવામાં આવ્યું. 6 કલાક ઓપરેશન ચાલ્યું હજુ બહું ખોરાક લેવાની મનાઇ છે. બરોબર બોર્ડની પરીક્ષા આવી મેં કહ્યુ ડ્રોપ લઇ લે, હું થોડીક હિંમત હારી ગયો પરંતુ મારા દીકરાએ કહ્યું પપ્પા પરીક્ષા તો દેવી જ છે ગમે તે થાય. સામાન્ય રીતે પરિવાર અને માતા-પિતા બોર્ડની પરિક્ષામાં બાળકોને હિંતમ આપતા હોય છે જ્યારે અહીં મારા દીકરાએ અમારા પરિવાર અને મને હિંમત આપી છે.

મલ્ટીપલ ડિસેબિલિટીથી પીડાતી હિન્દુ વિદ્યાર્થિનીનો રાઇટર બન્યો મુસ્લિમ વિદ્યાર્થી

શહેરની એકનાથ વિદ્યાલયમાં અભ્યાસ કરતી દિવ્યાંગ વિદ્યાર્થિની કરિશ્માના પેપર લખી વિદ્યાર્થી મહમદ જાફર સહારો બન્યો છે. હિન્દુ છાત્રાનો સહારો બની મુસ્લિમ વિદ્યાર્થી પરીક્ષા આપી રહ્યો છે. જન્મથી જ સેરેબ્રલ પાલ્સી અને મેન્ટલી રીટાયર્ડ કરિશ્માનાં અત્યાર સુધી આઠ ઓપરેશન થઈ ચૂક્યા છે. કુદરતનાં કરિશ્મારૂપ કરિશ્માનો સહારો બની મુસ્લિમ વિદ્યાર્થી પરીક્ષા આપતા કોમી એખલાસનાં દર્શન થઇ રહ્યા છે. બોર્ડની પરીક્ષામાં પણ હિન્દુ – મુસ્લિમ એકતા ઝળકી ઉઠે તે પ્રકારનો પ્રેરણાદાયક કિસ્સો રાજકોટમાં પ્રકાશમાં આવ્યો છે.

જડબામાં હાડકુ વધતા પગમાંથી હાડકુ કાઢી મોઢામાં ફીટ કર્યું, નાકમાં નળી, જે થાય એ પરીક્ષા તો આપીશ: ધો.10નો વિદ્યાર્થી was originally published on News4gujarati

ટેક્ષ આવકમાં 50 કરોડનું ગાબડુ પરંતુ, ઓનલાઈન કરદાતામાં 50 ટકા વધારો!


– રાજકોટ મહાપાલિકાની એકમાત્ર મુખ્ય આવક

ગત વર્ષે 3 લાખ કરદાતાઓએ 247 કરોડ ભર્યા અને આ વર્ષે 11 માસમાં 2.56 લાખ કરદાતા પાસેથી માત્ર 158 કરોડની આવક! વસુલાત નબળી

– લોકોને હવે સરકારી કચેરીના ધક્કા પોષાતા નથી,ઓનલાઈન કરદાતાની સંખ્યા 91000ને પાર

– મનપામાં વેબસાઈટથી ટેકસ  ભરવો સરળ અને અન્ય સરકારી  કચેરીઓ કરતા વધુ પ્રોત્સાહન 

– મનપાની કડક વસુલાત માત્ર એક-બે દિવસ પૂરતી સીમિત રહેતા આવકમાં મોટુ ગાબડું 

વર્ષે વીસ અબજનું બજેટ ફટાફટ ઘડી નાંખતી રાજકોટ મનપાની એકમાત્ર મુખ્ય આવક એવી મિલ્કતવેરાની વસુલાત ૨ અબજ સુધી પણ ચાલુ વર્ષે પહોંચી નથી. હવે માત્ર માર્ચ માસ બાકી રહ્યો છે ત્યારે પણ વસુલાત રૂટીન થઈ રહી છે ત્યારે ગત વર્ષની સાપેક્ષે હાલ આજ સુધીમાં થવી જોઈતી ટેક્સ આવકમાં રૂ।.૫૦ કરોડનું ગાબડુ પડયું છે. આની સાથે નોંધનીય બાબત એ બહાર આવી છે કે મનપાને ઓનલાઈન વેરો ભરનારામાં ૫૦ ટકાનો જંગી વધારો થયો છે અને ચાલુ વર્ષના અંત સુધીમાં એક લાખ મિલ્કતધારકો ઓનલાઈન ટેક્સ ભરતા થઈ જાય તેવી શક્યતા છે.

પ્રાપ્ત વિગત અનુસાર ઈ.સ.૨૦૧૮-૧૯ના ગત વર્ષમાં મહાપાલિકામાં પ્રથમવાર ૩ લાખથી વધુ, કૂલ ૩,૦૧,૩૭૪ મિલ્કતો પર  રૂ।.૨૪૭.૬૧ કરોડનો પાણી,ડ્રેનેજ,સામાન્ય સહિતના કર ચૂકવ્યા હતા. ગત વર્ષે પણ લક્ષ્યાંક કરતા આવક ૧૩ કરોડ ઓછી થઈ હતી. પરંતુ, ચાલુ વર્ષે તો આટલી આવક પણ નથી. વર્ષના ૧૧ માસમાં માત્ર ૨,૫૬,૯૧૭ મિલ્કતો પર (કૂલ મિલ્કતો વધીને ૫ લાખ)  માત્ર રૂ।.૧૫૮.૧૧ કરોડનો વેરો જ ભરાયો છે. 

જનરલબોર્ડમાં એક દિવસ, એક કલાક પુરતી આ મુદ્દે વિપક્ષે તડાપીટ બોલાવી અને શાસકોએ લૂલો બચાવ કર્યો પણ રૂ।.૮૫૧ કરોડની ઉઘરાણી સામે ૧૦ ટકા ઉઘરાણી પણ પાકી નથી તે મુદ્દે વર્ષે રૂ।.૩૪૫ કરોડનો પગાર-મહેકમ ખર્ચ કરતા સત્તાધીશોને જાણે કોઈ ચિંતા નથી જણાતી.  એક બે દિવસ પુરતી કડક કહેવાતી વસુલાત થયા બાદ હાલરૂટીન કામગીરી થઈ રહી છે. 

મનપાની આ નબળી કામગીરીની બીજી તરફ આવકાર્ય બાબત  એ છે કે મનપાએ ટેક્સ ઓનલાઈન ભરવાનું અન્ય સરકારી કચેરીઓ કરતા સરળ અને ખાસ કરીને પ્રોત્સાહક બનાવતા તેની નોંધપાત્ર અસર લોકો પર જોવા મળી છે. ગત વર્ષે ૧૨ મહિનામાં  ૭૨ હજાર એટલે કે ૧૧ માસમાં આશરે ૬૬ હજાર મિલ્કતધારકોએ આરએમસીની વેબસાઈટ પર ઓનલાઈન ટેક્સ ભર્યો તે સામે ચાલુ વર્ષે ૧૧ માસમાં ૯૧ હજાર કરદાતાઓએ ઓનલાઈન રૂ।.૪૬ કરોડનો વેરો ભર્યો છે. 

ગત વર્ષ કરતા પચાસ ટકા ઓનલાઈન કરદાતા વધ્યા તે દર્શાવે છે કે લોકોને બિલ ભરવા માટે સરકારી કચેરીએ ધક્કો ખાવાનું જરાય પોષાતુ નથી. પરંતુ, આ માટે ઓનલાઈન વેરો ભરવો સરળ (કોઈ ટેકનિકલ ક્ષતિ વગરનો) હોવાની સાથે લોકો જ્યારે બિલ,કર્મચારીનો ખર્ચ બચાવતા હોય ત્યારે વળતરની અપેક્ષા રાખે છે જે વળતર મનપા બિલ દીઠ રૂ।.૫૦નું અને આગામી વર્ષથી તો ૧ ટકા વિશેષ વળતર આપે છે તેવું વળતર અન્ય સરકારી કચેરીઓમાં મળતું નથી. આ વળતર સરકાર શરુ કરાવે તો લોકોના ધક્કા બચવા સાથે પારદર્શક પેમેન્ટ પણ થાય તેમ છે. 

ટેક્ષ આવકમાં 50 કરોડનું ગાબડુ પરંતુ, ઓનલાઈન કરદાતામાં 50 ટકા વધારો! was originally published on News4gujarati

ભઠ્ઠીઓ પર દરોડા, 5200 લીટર આથો અને 65 લીટર દારૂનો નાશ કરતા રસ્તા પર દેશી દારૂની નદી વહી, ત્રણની ધરપકડ


50 પોલીસની અલગ અલગ ટીમ દ્વારા રેડ, પાંચ શખ્સો સામે પ્રોહીબીશનનો ગુનો નોંધાયો

ગુજરાતમાં દારૂની રેલમછેલ વચ્ચે કડક કાર્યવાહી કરવા DGPએ આદેશ આપ્યા છે. જેના પગલે આજથી રાજકોટમાં 15 દિવસની મેગા ડ્રાઇવ શરૂ કરવામાં આવી છે. રાજ્ય પોલીસ વડાની સૂચના બાદ આજ રોજ રાજકોટ શહેર ખાતે થોરાળા પોલીસ મથક વિસ્તારમાં આવેલા કુબેલિયાપરા વિસ્તારમાં દેશી દારૂના અડ્ડા પર પોલીસે દરોડાની કામગીરી હાથ ધરી હતી. જેમાં 5200 લીટર આથો અને 65 લીટર દેશી દારૂનો જથ્થો ઝડપી પાડ્યો હતો. જેનો સ્થળ પર જ નાશ કરવામાં આવ્યો હતો. આથી રસ્તા પર દેશી દારૂ અને આથાની નદી વહી હોય તેવા દ્રશ્યો સર્જાયા હતા. તેમજ દેશી દારૂની ભઠ્ઠી ચલાવતા ત્રણ શખ્સની ધરપકડ કરી હતી. જેમાં સીતારામ ધીરૂ મકવાણા, રાધા મણી ઝાલા, રવિ મણીલાલ ઝાલા, દિનેશ નાથા સોલંકીનો સમાવેશ થાય છે. જ્યારે પાંચ શખ્સો વિરૂદ્ધ પ્રોહિબીશનનો ગુનો નોંધાયો છે.

થોરાળા અને ભક્તિનગર પોલીસની સંયુક્ત ટીમ દ્વારા દરોડા પાડવામાં આવ્યા

થોરાળા અને ભક્તિનગર પોલીસની સંયુક્ત ટીમ દ્વારા એક PI, સાત PSI સહિત 50 પોલીસ કર્મી દ્વારા દારૂના અડ્ડા પર રેડ કરવામાં આવી હતી. આ રેડ દરમિયાન પોલીસે દારૂના અડ્ડા ઉપરાંત રહેણાંક વિસ્તારમાં પણ છૂપાવેલા દેશી દારૂના આથાનો નાશ કર્યો હતો. રહેણાંક મકાનમાં રેડ કરતા ખૂબ મોટી માત્રામાં દેશી દારૂનો આથો મળી આવ્યો હતો. જેને સ્થળ પર જ ઢોળી નાશ કરવામાં આવ્યો હતો. જેના પગલે વરસાદી પાણીની જેમ વિસ્તારના રસ્તા પર દેશી દારૂના આથાની નદી વહેતી હોય તેવા દ્રશ્યો જોવા મળ્યા હતા. ઉલ્લેખનીય છે કે જ્યારે પણ ઉચ્ચ અધિકારીઓની સૂચના મળે બાદમાં આ રીતે દરોડાની કામગીરી કરવામા આવતી હોય છે. પરંતુ આ વિસ્તારમાં હર હંમેશ દેશી દારૂના અડ્ડા પોલીસ રેડ બાદ ફરી શરૂ થતા જોવા મળે છે. ત્યારે સવાલ છે કે શું કાયમી ધોરણે આ અડ્ડા બંધ કરવામાં પોલીસને સફળતા મળશે કે કેમ?

ભઠ્ઠીઓ પર દરોડા, 5200 લીટર આથો અને 65 લીટર દારૂનો નાશ કરતા રસ્તા પર દેશી દારૂની નદી વહી, ત્રણની ધરપકડ was originally published on News4gujarati

રાજકોટના 25 યુવાને થાઈલેન્ડમાં 8 દિવસ મજા કરી, હવે 14 દિવસ ઓબ્ઝર્વેશનમાં રહેશે


નિયમ મુજબ 14 દિવસ સુધી દરરોજ તેમની તબીયત પૂછવામાં આવશે 

વિશ્વમાં કોરોનાનો ભય હોવાથી લોકો કોરોનાગ્રસ્ત દેશોમાં જતા ડરે છે તેમજ ત્યાં ફસાયેલા પ્રવાસીઓ બહાર નીકળવા મથી રહ્યા છે તેમજ પરત આવે એટલે ઓબ્ઝર્વેશનમાં રહેવું પડે છે. આ સ્થિતિને કારણે ટૂરિઝમ પર ભારે અસર પડી છે અને ટૂરના ભાવ પડી ગયા છે. આવી કપરી સ્થિતિમાં રાજકોટના યુવાનોને તક દેખાઈ અને શહેરના 18 અને જિલ્લાના 7 યુવાન સસ્તા ભાવે થાઈલેન્ડની ટૂર કરવા નીકળી ગયા હતા. થાઈલેન્ડમાં આઠ દિવસ વિતાવી હરવા ફરવાની મોજ કર્યા બાદ જ્યારે
પરત ફર્યા એટલે તુરંત જ સરકારમાંથી તેઓને ઓબ્ઝર્વેશનમાં રાખવા માટેની સૂચના આવી ગઇ હતી જેથી હવે આ તમામ 14 દિવસ સુધી આરોગ્ય વિભાગની નજર હેઠળ જ રહેશે.

લક્ષણો દેખાશે તો આઈસોલેશન વોર્ડમાં રખાશે

આરોગ્ય વિભાગના સૂત્રો મુજબ આ તમામ યુવાન 20થી 35 વર્ષની વચ્ચેના છે તેમજ બધા સિંગલ જ ટૂર માટે ગયા હતા. હાલ તો એક પણ યુવાનમાં શરદી, ખાંસીના લક્ષણો જોવા મળ્યા નથી. નિયમ મુજબ 14 દિવસ સુધી દરરોજ તેમની તબીયત પૂછવામાં આવશે અને જો કોઇનામાં પણ સહેજે પણ શરદી, ખાંસી, તાવ જેવા લક્ષણો દેખાશે તો આઈસોલેશન વોર્ડમાં રખાશે.

રાજકોટના 25 યુવાને થાઈલેન્ડમાં 8 દિવસ મજા કરી, હવે 14 દિવસ ઓબ્ઝર્વેશનમાં રહેશે was originally published on News4gujarati

સસરાએ અડપલા કર્યાની પરિણીતાની ફરિયાદ, કાર, એસી, ફ્રીજ, વોશીંગ મશીન, ફર્નિચર માટે એક લાખ લાવવા કહ્યું


  • પરિણીતાએ પતિ સહિતના સાસરીયાઓ સામે ત્રાસ આપી દહેજની માંગણી કર્યાની ફરિયાદ મહિલા પોલીસમાં નોંધાવી
  • ફરિયાદમાં સસરા પરિવારના સભ્યોની હાજરીમાં પોતાની સાથે શારિરીક અડપલા કરતા હોવાનો ચોંકાવનારો આક્ષેપ કર્યો 

શહેરના કાલાવડ રોડ એ.જી. ચોક સદગુરૂ કોલોનીમાં સાતેક માસથી માતા-પિતા સાથે રહેતી 28 વર્ષની પરિણીતા સાથે સસરાએ અડપલા કર્યાની અને સાસારીયાઓ ત્રાસ આપતા હોવાની રાજકોટ મહિલા પોલીસ સ્ટેશનમાં ફરિયાદ નોંધાવી છે. પરિણીતાના સાસરીયાઓએ માવતરેથી કાર, એસી, ફ્રિજ, વોશીંગ મશીન, ફર્નિચર માટે એક લાખ લાવવાનું પણ કહ્યું હતું. આથી પોલીસે દામનગર મેઇન બજાર લાયબ્રેરી સામે જલારામ નિવાસ ખાતે રહેતા પરિણીતાના પતિ કુશલ કિશનભાઇ તન્ના, સસરા કિશનભાઇ વૃજલાલ તન્ના, સાસુ દક્ષાબેન તથા મુંબઇ રાજકોટ રહેતી ત્રણ નણંદો નિશા ભાવેશ કારીયા, રચના પ્રણવ પોરાણા અને પાયલ જલ્પેશ કારીયા સામે IPC 498 (ક), 354 (એ), 504, 114, દહેજધારાની કલમ 3, 7 મુજબ ગુનો નોંધી તપાસ હાથ ધરી છે.

છેલ્લા સાત મહિનાથી પરિણીતા રિસામણે છે

ફરિયાદમાં પરિણિતાએ જણાવ્યું છે કે, તે છેલ્લા સાતેક માસથી કાલાવડ રોડ પર રહેતા પિયરને ત્યાં રિસામણે છે. તેનાં લગ્ન 14 મે 2019ના રોજ લગ્ન થયા હતા. લગ્નનાં દોઢેક માસ સુધી સાસરીયાઓએ સારી રીતે રાખ્યા બાદ સાસુ દક્ષાબેને રસોઈ અને ઘરકામ બાબતે મેણાં-ટોણાં મારવાનું શરૂ કર્યું હતું. લગ્નના આઠેક દિવસ બાદ પતિની ગેરહાજરીમાં એક દિવસ સાસુએ તેને કહ્યું કે જા તને તારા સસરા બોલાવે છે. જેથી તે સસરા પાસે જતાં તેણે પોતાની નજીક બેસાડી ખભા પર હાથ મૂક્યા બાદ અડપલા કર્યા હતા. આથી પતિ આવતા તેને આખી વાત જણાવતા કહ્યું કે હું પપ્પા સાથે વાત કરી લઈશ. ત્યારબાદ ઉપરના રૂમમાં જઈ પરત આવી મેં પપ્પા સાથે વાત કરી લીધી છે. હવે પછી આવું નહીં કરે. પતિની વાત તેણે માની લીધી હતી. બાદમાં હનિમુનની વાત થતા જ સસરાએ કહ્યું, અમે પણ તમારી સાથે હનિમુનમાં આવશું, જોઈશું તમે શું કરો છો?

સસરાએ અડપલા કર્યાની પરિણીતાની ફરિયાદ, કાર, એસી, ફ્રીજ, વોશીંગ મશીન, ફર્નિચર માટે એક લાખ લાવવા કહ્યું was originally published on News4gujarati

ગુજરાતના ખેડૂતો ખુશખુશાલ: ગોંડલ માર્કેટ યાર્ડમાં મરચાનો ભાવ જાણીને આનંદની લાગણી વ્યાપી


ગોંડલનાં પ્રખ્યાત મરચા ખરીદવા માટે ગુજરાત બહારના અન્ય રાજયમાંથી ઘણા વેપારીઓ આવતા હોય છે, ત્યારે રાજકોટના ગોંડલ માર્કેટ યાર્ડમાં મરચાને લઈને એક મહત્વપૂર્ણ સમાચાર મળી રહ્યા છે. સૂકા મરચાનાં હબ ગણાતા ગોંડલ માર્કેટ યાર્ડમાં 25000 ભારી મરચાની આવક થવા પામી છે. 20 કીલોનાં ભાવ 2000થી 2500 સુધીનાં બોલાતા ખેડૂતોને પણ પોષણક્ષમ ભાવ મળતા આનંદની લાગણી વ્યાપી હતી. ગત વર્ષ કરતા મરચાના ભાવમાં તેજી પણ આવી છે.

ચાલું વર્ષે મરચાની 25 હજાર ભારીની આવક થઈ હોવાની માહિતી સામે આવી છે. ગોંડલ માર્કેટ યાર્ડમાં ખેડૂતોને હાલ 20 કિલો મરચાનો ભાવ રૂપિયા 2000થી 2500 મળી રહ્યા છે. જેનો સીધો ફાયદો ખેડૂતોને મળી રહ્યો છે. ગોંડલ માર્કેટ યાર્ડમાં મરચાની વેરાયટીઓ 002, 035, રેવા, શાનીયા, વગેરેની આવક થઈ રહી છે. 10 ટકા જેટલી દેશી રેસમ પટ્ટાની પણ આવક થઈ છે. ગોંડલ તાલુકા વિસ્તારમાં આશરે 20 જેટલી વેરાયટીઓનું ઉત્પાદન થઈ રહ્યું છે. અત્યાર સુધીમાં 1 લાખથી વધારે ભારીઓનું વેચાણ થયેલ છે.

મરચાનાં પુરા ભાવ મેળવવા માટે ખેડુતભાઈઓને એક સાથે માલ ન મોકલવા તબકકાવાર થોડા થોડા પ્રમાણમાં માલ મોકલવા તથા માર્કેટ યાર્ડમાં મરચાનું વેચાણ કરવા યાર્ડના સત્તાધીશો દ્વારા અનુરોધ કરવામાં આવ્યો છે.

ગુજરાતના ખેડૂતો ખુશખુશાલ: ગોંડલ માર્કેટ યાર્ડમાં મરચાનો ભાવ જાણીને આનંદની લાગણી વ્યાપી was originally published on News4gujarati

રાજકોટમાં વિજ્ઞાાનના વિદ્યાર્થીઓએ તૈયાર કર્યા રોમાંચક રોબોટ-રોકેટ


– સુર્ય ઉર્જાની પેનલનાં ઉપયોગથી ખેતર ખેડી શકાય તેવું આધુનિક ઉપકરણ

– પ્લાસ્ટીકના નકામા કચરાના કાયમી નિકાલ માટે ડીપ્લોમા ઈજનેરીના વિદ્યાર્થીઓએ ‘સ્ટીમ ટ્રાવેલ પાઈપ’ની કૃતિ દ્વારા તૈયાર કર્યું વાહનોમાં વપરાતુ ઈંધણ

– રાજકોટમાં ઈસરોની પ્રદર્શની સાથે ત્રણ દિવસના સાયન્સ કાર્નિવલનો પ્રારંભ; વૈજ્ઞાાનિકો સાથે ગોષ્ઠી

સુર્યદેવ એ ઉર્જાનો ભંડાર છે. અવકાશ વિજ્ઞાાન ક્ષેત્રે આપણે દુનિયાના દેશોને આશ્ચર્યચકિત કરી દઈએ તેવા સંશોધનો જેમ થયા છે એ જ રીતે સુર્ય ઉર્જાના સંશોધનો થકી પણ ભારત દેશ વિશ્વ વિખ્યાત બનશે તેવી આશા સાથે આજે સાયન્સ કાર્નિવલમાં અનેક વિદ્યાર્થીઓએ સુર્ય ઉર્જા આધારીત વિવિધ કૃતિઓ રજૂ કરીને અનેક લોકોને આશ્ચર્યચકિત કરી દીધા હતા.

રાજકોટમાં આજથી એવીપીટીઆઈ ખાતે ઈસરો દ્વારા વિવિધ ઉપગ્રહોના મોડેલની પ્રદર્શની સામે સાયન્સ કાર્નિવલ ખુલ્લો મુકવામાં આવ્યો હતો. ત્રણ દિવસના આ સાયન્સ કાર્નિવલમાં રાજકોટ શહેર અને ગ્રામ્ય વિસ્તારની ૧૫૦થી વધુ શાળાના ધો. ૮, ૯ અને ૧૧ના વિદ્યાર્થીઓએ અવનવા સંશોધનના વિવિધ મોડેલ રજૂ કરીને સૌને આશ્ચર્યચકિત કરી દીધા હતા.

સુર્ય ઉર્જા થકી આપણે ઉર્જાનો વિકલ્પ ઉભો કરી શકીએ છીએ. સોલાર ફોટોવોલ્ટીક સેલ દ્વારા ખેતીકામ થઈ શકે, નંદામણ દૂર કરી શકાય તેમજ ખેતરમાં હલ હલાવીને જમીનને સમથળ કરવાનું કામ પણ સરળતાથી થઈ શકે તેવી આધુનિક કૃતિ ધો. ૯ની વિદ્યાર્થીની કુ. ખુશાલીબેન મકવાણા, ખુશીબેન કોટડિયાએ રજૂ કરી હતી. આ વિદ્યાર્થીનીઓએ જણાવ્યું હતું કે આપણા પ્રદેશમાં ૭થી ૮ મહિના સુધી સુર્યપ્રકાશ પુરતા પ્રમાણમાં હોય છે તેથી સોલાર પેનલની મદદથી ટ્રેક્ટર જેવા પૈડા જોડીને એક સાદુ ઉપકરણ તૈયાર કરવાથી ખેતીકામમાં સોલાર પંપ તૈયાર થઈ જાય છે જે ખેતર ખેડવામાં ઉપયોગી થાય છે.

પ્લાસ્ટીકનો નકામો કચરો દુનિયાભરના લોકો માટે ચિંતાનો મુદ્દો બની રહ્યો છે ત્યારે પ્લાસ્ટીકના નકામા કચરાનો નિકાલ કરવા માટે નાની એવી ચેમ્બર બનાવી તેમાંથી ઓઈલ તૈયાર કરવાની કૃતિ ડિપ્લોમાનો અભ્યાસ કરનારા વિદ્યાર્થીઓ રૈયાન પરમાર, મકબુલહક અંસારી, અમન સોલંકીએ તૈયાર કરી હતી. આ વિદ્યાર્થીઓએ ‘સ્ટીમ ટ્રાવેલ પાઈપ’ નામની કૃતિ રજૂ કરી જણાવ્યું હતું કે ૫૦૦ કિલોગ્રામ પ્લાસ્ટીકના વેસ્ટમાંથી ૩૫૦થી ૪૦૦ ગ્રામ ઈંધણ તૈયાર થઈ શકે છે. જે આર્થિક રીતે પરવડે તેમ છે. પ્લાસ્ટીકના કચરાનો નિકાલ કરવાની સિન્થેટીક ગેસ પણ મળી શકશે તેમજ નકામો કચરો ડામર બનાવવામાં ઉપયોગી થશે.

અવકાશ વિજ્ઞાાન ક્ષેત્રની રોમાંચક કૃતિ આદિત્ય ઠાકરે તૈયાર કરી છે. તેઓએ અવકાશમાં સ્પેસ મીશન માટેની ઉપયોગી રોબોટ બોગી બનાવી જણાવ્યું હતું કે આ એ પ્રકારનો રોબોટ છે જેને કોમ્પ્યુટરની મદદથી કોઈપણ પ્રકારના રેસ્ક્યુ ઓપરેશનમાં પણ કામે લગાડી શકાય છે. ગમે તેવા ઉતાર-ચઢાણવાળા રસ્તા ઉપર આસાનીથી આ રોબોટ કામ કરે છે. વસ્તુઓ પકડી શકે છે. ચીજવસ્તુઓ લાવી શકે છે. રાજવીરસિંહ પરમાર નામના વિદ્યાર્થીએ ન્યુક્લીયર પાવર સ્ટેશનની કૃતિધો. ૮ના વિદ્યાર્થીની કુ. દિવ્યાબા ચૌહાણ અને મૌસમી મકવાણાએ આઘાત-પ્રત્યાઘાતના સિદ્ધાંત ઉપર રોકેટની કૃતિ રજૂ કરી હતી.

ઈસરો દ્વારા આકાશમાં છોડવામાં આવેલા વિવિધ ઉપગ્રહોના મોડેલની જાણકારી મેળવીને વિજ્ઞાાનમાં રસ ધરાવતા વિદ્યાર્થીઓ અચંબિત થઈ ગયા હતા. સી.વી. રામન મેથેમેટીક્સ ક્લબ દ્વારા ગણિતના વિવિધ મોડેલો સમજાવતી કૃતિઓ પણ આકર્ષણરૂપ રહી હતી.

રાજકોટમાં વિજ્ઞાાનના વિદ્યાર્થીઓએ તૈયાર કર્યા રોમાંચક રોબોટ-રોકેટ was originally published on News4gujarati

રાજકોટ યાર્ડમાં કમિશન એજન્ટ એસો.ની ઓફિસ સીલ, પ્રમુખ સહિત 3ને નોટિસો


– વારંવાર અચાનક-અનિશ્ચિત મુદતની હડતાળોથી ત્રાસીને યાર્ડનું પગલુ

– યાર્ડમાંથી વચેટિયાઓને ક્રમશઃ દૂર કરવા ચેરમેનનો નિર્દેશ,સહકારી મંડળીઓ જ ખેડૂતોનો માલ ખરીદીને કરશે વેચાણ

– કૃષિ પેદાશની સીઝનમાં યાર્ડ દસ દિવસથી બંધ! હજારો ખેડૂતોનો કરોડોનો કૃષિ માલ અટવાઈ ગયો

– યાર્ડના ખુદ એક ડિરેક્ટર પણ હડતાળમાં જોડાતા તેને પણ અપાતી નોટિસ, સસ્પેન્સનની થશે કાર્યવાહી

રાજકોટ માર્કેટયાર્ડમાં મચ્છરોના અતિશય ત્રાસ સામે એકસૂરમાં દરેકનો વિરોધ હવે ગૌણ બની ગયો છે અને પોલીસ કેસના મુદ્દે યાર્ડના અમુક વેપારી આગેવાનો અને યાર્ડના સત્તાધીશો વચ્ચેના ગજગ્રાહનો મુદ્દ મુખ્ય બન્યો છે.હડતાળ આજે દસ દિવસે પણ નહીં સમેટાતા અને હજારો ખેડૂતો, મજુરોની રોટીરોટીનો પ્રશ્ન ઉભો થતા અંતે માર્કેટ યાર્ડ આકરા પાણીએ થયું છે. આજે કમિશન એજન્ટ એસોસીએશનને યાર્ડમાં ફાળવાયેલી કચેરીને સીલ કરી દેવાઈ હતી અને છાશવારે અચાનક અને અનિશ્ચિત મુદતની હડતાળના દુષણને ડામવા હવે યાર્ડમાંથી દાયકાઓ જુની કમિશન એજન્ટ (દલાલો)ની પ્રથા જ નાબુદ કરવાનો નિર્દેશ પણ યાર્ડે આજે આપ્યો હતો.

હડતાળની આગેવાની લેનારા કમિશન એજન્ટ એસોસીએશનના પ્રમુખ અતુલ કામાણી, ખુદ યાર્ડના જ ડિરેક્ટર અને વેપારી વલ્લભ પાંચાણી અને કિશોર દોંગા એ ત્રણ આગેવાનોને શોકોઝ નોટિસ ફટકારાઈ છે તેમ માર્કેટયાર્ડના ચેરમેન ડી.કે.સખિયાએ જણાવ્યું હતું. ઓફિસ સીલ કરવાની અને નોટિસ ફટકારવાની કાર્યવાહીનું રોજકામ કરાયું છે અને અન્ય આગેવાનો જે મચ્છરોનો ઉપદ્રવ દૂર  કરવાની કાર્યવાહી થઈ અને આ પ્રશ્ન હળવો થયો છતાં હડતાળ જારી રખાવે છે તેમને નોટિસ આપવા અને લાયસન્સ રદ કરવા પ્રક્રિયા હાથ ધરાઈ છે.

તેમણે ઉમેર્યું કે યાર્ડને હડતાળથી વારંવાર બાનમાં લેવાય તે કોઈ સંજોગોમાં સાંખી લેશું નહીં, વળી સરકારનો નિર્દેશ છે તે મૂજબ યાર્ડમાંથી ખેડૂતો અને નાના વેપારીઓ વચ્ચે વચેટિયા અર્થાત્ કમિશન દલાલોની પ્રથા જ ક્રમશઃ નાબુદ કરવા પણ કાર્યવાહી હાથ ધરવા સર્વાનુમતે નિર્ણય લેવાયો છે. તેના વિકલ્પે વિવિધ સહકારી મંડળીઓ, ખરીદ વેચાણ સંઘ સાથે પરામર્શ ચાલી રહ્યો છે અને તેમના મારફત ખેડૂતોની કૃષિ જણસોની ખરીદી અને વેચાણ કરાવવા પણ તજવીજ હાથ ધરાઈ છે. યાર્ડના સત્તાધીશોએ જણાવ્યું કે ૯૫ ટકા વેપારીઓ તો શાંતિથી ધંધો કરવા માંગે છે પણ કેટલાક આગેવાનો યાર્ડમાં રહીને યાર્ડના તંત્ર સામે કાવાદાવા કરે છે. આ અંગે કમિશન એજન્ટ એસો.તરફથી કોઈ પ્રતિભાવ કે વિગતો જારી કરાઈ ન્હોતી તે ઉલ્લેખનીય છે.  

બીજી તરફ માર્કેટયાર્ડ ક્યારે ખુલશે તે અનિશ્ચિતતાથી ખેડૂતોમાં ચિંતાની લાગણી પ્રસરી છે. સેંકડો મજુરોની આજીવિકા પર પ્રશ્નાર્થ સર્જાયો છે. દસ દિવસમાં રૂ.૧૦૦થી ૧૨૦ કરોડનું ટર્નઓવર અટકી ગયું છે, અર્થાત્ એટલી રકમની કૃષિપેદાશો વેચાયા વગર અટવાઈ જતા અને તે પણ ઘંઉ, મરચા,જીરુ વગેરેની સીઝન આવી રહી છે ત્યારે ઠપ્પ થતા ખેડૂતોમાં પણ યાર્ડની કામગીરી સત્વરે ચાલુ કરાવવા તીવ્ર માંગ ઉઠી છે.

રાજકોટ યાર્ડમાં કમિશન એજન્ટ એસો.ની ઓફિસ સીલ, પ્રમુખ સહિત 3ને નોટિસો was originally published on News4gujarati

સીઝ કરેલી 156 પૈકીની 16 બોરીમાંથી એફ.એસ.એલ.એ લીધા મગફળીના નમૂના


– જૂનાગઢ માર્કેટ યાર્ડમાં થયેલા મગફળી કૌભાંડ બાદ

– કૌભાંડની તપાસ કરનાર એલ.સી.બી.એ અગાઉ વેપારી સહિત ત્રણ શખ્સોની કરી હતી ધરપકડ

જૂનાગઢ માર્કેટ યાર્ડમાં થયેલા મગફળી કૌભાંડ બાદ ૧૫૬ બોરી મગફળી સીઝ કરી ગાંધીગ્રામમાં આવેલા ગોડાઉનમાં રાખવામાં આવી હતી. આજે એલ.સી.બી.એ એફ.એસ.એલ.ને સાથે રાખી ત્યાંથી રેન્ડમલી ૧૬ બોરીમાંથી મગફળીનાં નમૂના લીધા હતાં. આ મગફળીના નમૂનાની એફ.એસ.એલ. દ્વારા તપાસ કરવામાં આવશે.

થોડા દિવસો પહેલા જૂનાગઢ યાર્ડમાં ખેડૂતો પાસેથી ખરીદ કરેલી સારી મગફળી કાઢી લઈ તેની જગ્યાએ નબળી મગફળી ધાબડી દેવાનું કૌભાંડ સામે આવ્યું હતું. આ શખ્સો સી.સી.ટી.વી. કેમેરામાં કેદ થઈ ગયા હતાં. આ અંગે ખરીદ કેન્દ્રના ઈન્ચાર્જ ફરિયાદ કરતા એલ.સી.બી.એ. તપાસ હાથ ધરી હતી. અને સીઝ કરાયેલી ૧૫૬ બોરી મગફળીનો જથ્થો ગાંધીગ્રામમાં આવેલા પૂરવઠા વિભાગના ગોડાઉનમાં રાખ્યો હતો.

એલ.સી.બી.એ. મગપળી કૌભાંડ મામલે યાર્ડના વેપારી, તેના માણસ તથા લેબર કોન્ટ્રાકટરની ધરપકડ કરી હતી. 

આ કૌબાંડની તપાસ કરનાર એલ.સી.બી. એફ.એસ.એલ. તથા પૂરવઠા વિભાગના અધિકારીઓની હાજરીમાં ગોડાઉનમાં સીઝ કરાયેલી મગપલીની ૧૫૬ બોરીમાં તપાસ કરી એફ.એસ.એલ. દ્વારા ૧૬ બોરીમાંથી રેન્ડમલી મગફળીના નમૂના લેવામાં આવ્યા હતાં. એફ.એસ.એલ. આ નમૂનાનું પૃથ્થકરણ કરી તેનો રિપોર્ટ આપશે. ત્યારબાદ વધુ કાર્યવાહી કરવામાં આવશે.

સીઝ કરેલી 156 પૈકીની 16 બોરીમાંથી એફ.એસ.એલ.એ લીધા મગફળીના નમૂના was originally published on News4gujarati

Previous Older Entries

Blog Stats

  • 517,408 hits
%d bloggers like this: